॥ ॐ ॥
श्रीगणेशाय नमः
यतोऽनन्तशक्तेरनन्ताश्च जीवाः
यतो निर्गुणादप्रमेया गुणास्ते ।
यतो भाति सर्वं त्रिधा भेदभिन्नं
सदा तं गणेशं नमामो भजामः ॥ १ ॥
यतश्चाविरासीज्जगत्सर्वमेतत्
तथाब्जासनो विश्वगो विश्वगोप्ता ।
तथैन्द्रादयो देवसङ्घा मनुष्याः
सदा तं गणेशं नमामो भजामः ॥ २ ॥
यतो वह्निभानू भवो भूर्जलं च
यतः सागराश्चन्द्रमा व्योम वायुः ।
यतः स्थावरा जङ्गमा वृक्षसङ्घाः
सदा तं गणेशं नमामो भजामः ॥ ३ ॥
यतो दानवा किंनरा यक्षसङ्घाः
यतश्चारणाः वारणाः श्वापदाश्च ।
यतः पक्षिकीटा यतो वीरुधश्च
सदा तं गणेशं नमामो भजामः ॥ ४ ॥
यतो बुद्धिरज्ञाननाशो मुमुक्षोः
यतः सम्पदो भक्तसन्तोषदाः स्युः ।
यतो विघ्ननाशो यतः कार्यसिद्धिः
सदा तं गणेशं नमामो भजामः ॥ ५ ॥
यतः पुत्रसम्पद्यतो वाञ्छितार्थो
यतो भक्तिविघ्नौघनाशोऽखिलश्च ।
यतो शोकमोहौ यतो काम एव
सदा तं गणेशं नमामो भजामः ॥ ६ ॥
यतोऽनन्तशक्तिः स शेषो बभूव
धराधारणेऽनेक रूपे च शक्तः ।
यतोऽनेकधा स्वर्गलोकाः हि नाना
सदा तं गणेशं नमामो भजामः ॥ ७ ॥
यतो वेदवाचो विकुण्ठा मनोभिः
सदा नेति नेतीति यं गृणन्ति ।
परब्रह्मरूपं चिदानन्दरूपं
सदा तं गणेशं नमामो भजामः ॥ ८ ॥
फलश्रुतिः
गणेशाष्टकमिदं पुण्यं
यः पठेन्नियतः शुचिः ।
सर्वकार्येषु सिद्धिं च
लभते नात्र संशयः ॥
॥ इति श्रीगणेशाष्टकं सम्पूर्णम् ॥
