॥ ॐ ॥
श्रीगणेशाय नमः
गजाननाय गाङ्गेयसहजाय सदात्मने ।
गौरीप्रियतनूजाय गणेशायास्तु मङ्गलम् ॥ १ ॥
नागयज्ञोपवीताय नतविघ्नविनाशिने ।
नन्द्यादिगणनाथाय नायकायास्तु मङ्गलम् ॥ २ ॥
इभवक्त्राय चेन्द्रादिवन्दिताय चिदात्मने ।
ईशानप्रेमपात्राय चेष्टदायास्तु मङ्गलम् ॥ ३ ॥
सुमुखाय सुशान्ताय सुखदाय सुखात्मने ।
सुरवन्द्यपदाम्भोजाय सर्वदास्तु मङ्गलम् ॥ ४ ॥
चतुर्भुजाय चन्द्रार्धविलसन्मस्तकाय च ।
चरणावनतानन्ततारणायास्तु मङ्गलम् ॥ ५ ॥
वक्रतुण्डाय वटवे वन्द्याराध्याय धीमते ।
विरूपाक्षसुतायास्तु विघ्नराजाय मङ्गलम् ॥ ६ ॥
प्रमोदामोदरूपाय सिद्धिविज्ञानरूपिणे ।
प्रकृष्टपापनाशाय फलदायास्तु मङ्गलम् ॥ ७ ॥
मङ्गलं गणनाथाय मङ्गलं हरसूनवे ।
मङ्गलं विघ्नराजाय विघ्नहर्त्रेऽस्तु मङ्गलम् ॥ ८ ॥
फलश्रुतिः
यः पठेन्मङ्गलाष्टकं
भक्त्या श्रद्धासमन्वितः ।
तस्य सर्वाणि कार्याणि
सिध्यन्ति गणनायकात् ॥
॥ इति श्रीगणेशमङ्गलाष्टकं सम्पूर्णम् ॥
